آئیے مل کر زندگی بہتر بنائیں۔

نسب اور خاندانی پس منظر

زندگی ڈویلپمنٹ آرگنائزیشن کے بانی محترم حضرت مفتی احمد شاہ جمالی صاحب کا تعلق جنوبی پنجاب کے ایک عظیم علمی و روحانی گھرانے سے ہے۔

آپ کے والدِ ماجد حضرت مولانا بشیر احمد شاہ جمالی رحمہ اللہ سلسلہ عالیہ نقشبندیہ کے جید بزرگ اور اپنے وقت کے جلیل القدر عالمِ دین تھے۔ آپ کے تایا جان حضرت مولانا رشید احمد شاہ جمالی دامت برکاتہم العالیہ سلسلہ نقشبندیہ کی ممتاز روحانی شخصیت ہیں۔

اس مبارک خاندان کے دونوں بزرگوں کا مزاج شروع ہی سے داعیانہ رہا ہے، ان کے سینوں میں اشاعتِ دین کی تڑپ اور غرباء و مساکین کی خدمت کا جذبہ کوٹ کوٹ کر بھرا ہوا تھا۔ اسی روحانی و دینی تربیت کے سائے میں مفتی صاحب نے آنکھ کھولی۔

جذبہ خدمت کی ابتداء - 2010 کے سیلاب سے

سن 2009-10 کے ہولناک سیلاب کے موقع پر جب پورا علاقہ زیر آب آ گیا، تو والدِ محترم رحمہ اللہ کے حکم پر حضرت مفتی صاحب نے اپنے تمام اساتذہ اور طلباء کے ہمراہ اپنے پورے ادارے کو سیلاب زدگان کی خدمت کے لیے وقف کر دیا۔

دن رات خدمت کا وہ منظر آج بھی لوگوں کے ذہنوں میں تازہ ہے۔ خیمہ بستیاں آباد کی گئیں، متاثرین میں راشن تقسیم کیا گیا، مفت میڈیکل کیمپس لگائے گئے، کشتیوں کے ذریعے پھنسے ہوئے لوگوں کو نکالا گیا، عارضی پناہ گاہوں اور صبح و شام کھانے کا باقاعدہ اہتمام کیا گیا۔

یہیں سے اس موروثی اور فطری جذبے کو ایک باقاعدہ راستہ ملا، اور یہ خدمت سیلاب تک محدود نہ رہی بلکہ ادارے کا ایک مستقل شعبہ بن گئی جسے "شعبہ خدمتِ خلق" کا نام دیا گیا۔

پسماندہ علاقوں کی محرومی کا درد

خدمت کے اس سفر میں دوسرا بڑا محرک ان پسماندہ دیہی علاقوں کی پرسانِ حالی بنا، جہاں زندگی کی بنیادی سہولیات تک مفقود ہیں۔ نہ تعلیم کی سہولت، نہ صحت کی، نہ روزگار کی، اور اس محرومی کے ساتھ بڑھتی ہوئی بے دینی نے دیہات کی مساجد کو بھی ویران کر دیا تھا۔

اسی درد نے اس فکر کو جنم دیا کہ کیوں نہ ان ویران مساجد کو ہی آباد کر کے ایک ایسا مرکز بنایا جائے جو بیک وقت مکتب بھی ہو، اسکول بھی ہو، کمیونٹی سینٹر بھی ہو اور ایک حقیقی عبادت گاہ بھی، جو ہر قسم کی مسلکی منافرت سے پاک ہو۔ جہاں بہترین مدرسین دینی و عصری تعلیم کے ساتھ بہتر روزگار کے لیے ہنر بھی سکھائیں۔

ایک منظم ادارے کی تشکیل

اسی جامع فکر کو منظم انداز میں آگے بڑھانے کے لیے باقاعدہ طور پر ایک رجسٹرڈ فلاحی ادارے "زندگی ڈویلپمنٹ آرگنائزیشن" کی بنیاد رکھی گئی۔

الحمدللہ آج اللہ کے فضل، بزرگوں کی دعاؤں اور حضرت مفتی صاحب کی شبانہ روز محنت سے یہ قافلہ ضلع ڈیرہ غازی خان سمیت ملک بھر کے دردِ دل رکھنے والے احباب، علماء کرام اور ڈاکٹر حضرات پر مشتمل ایک بڑی تحریک بن چکا ہے۔

اب تک کی نمایاں خدمات

ادارے کی اب تک کی خدمات کا مختصر خاکہ یہ ہے:

• اب تک سات مکاتب آباد کیے جا چکے ہیں جہاں نو سو سے زائد بچے اور بچیاں زیورِ تعلیم سے آراستہ ہو رہے ہیں۔
• مرکزی ادارے میں ایک ووکیشنل ٹریننگ سینٹر قائم ہے جس میں ٹیلرنگ، ویلڈنگ، پلمبنگ اور کمپیوٹر کی فنی تربیت طلباء کی استعداد کے مطابق دی جاتی ہے۔
• خواتین کی خود کفالت کے لیے سلائی کڑھائی سینٹر کا قیام۔
• وقتاً فوقتاً اصلاحی و دینی پروگرامز، مفت میڈیکل کیمپس اور شفاف پانی کی فراہمی کے لیے کنوؤں اور ہینڈ پمپس کی تنصیب۔
• یتیم و نادار بچوں کے لیے دارالایتام اور رہائشی طلباء کے قیام و طعام کی مکمل کفالت۔

یہ سفرِ خدمت آج بھی اسی اخلاص اور جذبے کے ساتھ جاری و ساری ہے۔